Rezultatet prej një prove klinike ndërkombëtare kanë treguar se qelizat staminale janë në gjendje të stopojnë sëmundjen dhe madje të përmirësojnë simptomat.
Skleroza Multiple (MS) është një sëmundje e cila mundet të prekë nervat e shtyllës kurrizore dhe/ose të trurit , e potencialisht mundet të shkaktojë probleme me lëvizshmërinë e krahëve dhe këmbëve, me shikimin dhe ndjeshmërinë. Vlerësohet se ka mbi 100,000 persona të diagnostikuar me Sklerozë Multiple vetëm në Mbretërinë e Bashkuar.
Trajtimi përfshinte "fshirjen" e sistemit imunitar të vetë pacientit, përpara se të ristartonte këtë sistem me qeliza staminale hematopoietike të shëndetshme.
Prof. Basil Sharrack, neurolog dhe drejtor i kërkimeve rreth Sklerozës Multiple në Spitalin Royal Hallamshire Hospital, tha për BBC: "Kjo është një analizë e ndërmjetme, por pasur parasysh këtë, ky është rezultati më i mirë që unë kam parë në ndonjë provë klinike për sklerozën multiple".
Prova klinike përfshiu pak mbi 100 individë me Sklerozë Multiple të cilët u trajtuan ose me qeliza staminale ose me medikamente tradicionale. Nga ata prej grupit i cili u trajtua me qeliza staminale, pas një viti, vetëm njëri vuajti prej rikthimit të sëmundjes krahasuar me 39 syresh të cilët i përkisnin grupit që u trajtua me medikamente.
‘Pas një ndjekjeje prej mesatarisht tri vjetësh, transplantet kishin dështuar në vetëm tre raste nga 52 pacientë (6%), krahasuar me 30 nga 50 (60%) gjithësej në grupin e kontrollit.’
Prof. Richard Burt, drejtues i kërkimeve nga Universiteti Veriperëndimor i Çikagos, tha për BBC se: "Të dhënat janë impresionuese në favor të transplantit kundrejt atyre prej medikamenteve më të mira të disponueshme - komuniteti i neurologëve ka qenë skeptik rreth këtij trajtimi por këto rezultate mund ta ndryshojnë këtë".
Fergus Walsh, korrespondent i BBC, foli me njërën prej pacientëve pjesëmarrës në provën klinike;
Louise u diagnostikua me Sklerozë Multiple në 2010 kur ajo ishte vetëm 28 vjeç.
Ajo, tha: "Skleroza Multiple kontrollonte jetën time dhe unë jetoja me frikën e një tjetër rikthimi të sëmundjes.
"Periudha më e vështirë ishte kur nuk isha në gjendje të çohesha nga shtrati pasi nuk kisha stabilitet në trupin tim - Unë luftoja shumë për të ecur dhe madje kalova disa kohë në karrige me rrota.
"Sëmundja, gjithashtu, më ndikoi edhe në aftësinë time të të njohurit - ishte njësoj si një lloj mjegulle në tru dhe unë i lexoja fjalët gabim dhe luftoja shumë për të vijuar bashkëbisedimet".
Panorama e BBC, e filmoi atë ndërsa po i nënshtrohej transplantit në Tetor 2015 dhe ajo është rikthyer tashmë me shëndet të plotë.Ajo u martua me partnerin e saj Steve, në përvjetorin e parë pasi kishte kryer transplantin, dhe vajza e tyre, Joy, tani është një muajshe.
"Unë ndihem sikur diagnoza ime ishte veç një ëndërr e keqe. Unë tani e jetoj jetën siç më pëlqen dhe nuk e planifikoj më jetën time për t' ju përshtatur Sklerozës Multiple".
